.................................... .................................... ........................................................................ ....................................தமிழர்களே வாருங்கள்..................................... ........................................................................ ........................................................................

April 7, 2012

திராவிடக் கட்சிகளை தலைமையேற்க "அது" வேண்டுமாம் -எது?...

திராவிடர் இயக்கத்திற்கு தலைமை ஏற்பது சாதாரண விஷயமில்லை என்று மாண்புமிகு முதல்வர் ஜெயலலிதாவுக்காக ஒரு கட்டுரை -வீராவேச மணிகளால் விடுதலை ஏட்டில் எழுதப்பட்டிருந்ததை வாசிக்க நேர்ந்தது. திராவிட இயக்கத்திற்கு தலைமை ஏற்பது சாதாரண விஷயமா? அசாதாரண விஷயமா என்றொரு பார்வை பார்த்து விடுவோம். ஏன் எனில் திராவிட கட்சிகளாக இருந்தால் என்ன... ஏனைய கட்சிகளாக இருந்தால் என்ன... தலைமையேற்பதற்கு தகுதிகளாக சில அடிப்படை விஷயங்களை நாம் நினைத்திருந்தோம். அதுதான் கண் முன்னே எல்லா கட்சிகளிலும் நடக்கவும் செய்கிறது.

ஒன்று வாரிசுகளாக இருக்க வேண்டும் அல்லது துணைவிகளாக இருக்க வேண்டும் அல்லது இமாலய ஊழல் புரிந்தவனாக, மிக பெரிய கிரிமினலாக இருக்க வேண்டும் இப்படி எதுவும் இல்லையென்றால் சினிமா நடிகனாகவாவது இருக்க வேண்டும். இதை தான் திராவிட இயக்க கட்சிகளில் இருந்து நூற்றாண்டை தாண்டிய காங்கிரஸ் வரை சகல கட்சிகளிலும் பார்க்கிறோம். ஆனால் வீராவேசமணிகள் "அ னா... ஆ வன்னா... தெரியாதவர்கள் தலைமை பதவிக்கா" என்கிறார்கள். "பள்ளிக்கூடம் பக்கமே போகாதவர் கல்வி அமைச்சர் ஆவது பகுத்தறிவுக்கு தெரியாதா?"

விடுதலை எழுதிய கட்டுரையை சுருக்கி தருகிறோம். "திராவிடர் இயக்கத்திற்குத் தலைமை பதவி வகிப்பது என்றால் சாதாரணமானதா? இந்த அடிப்படை உயிர் எழுத்துக் களையும், மெய்யெழுத்துக்களையும் படிக்காமல், உணராமல், ஏற்காமல் எப்படி திராவிடர் இயக்கத்தில் உறுப்பினராகக்கூட ஆக முடியும்? உறுப்பினராகவே ஆக முடியாது என்றால் எப்படி கட்சியின் பொதுச் செயலாளராக இருக்க முடியும்?" என்று கட்டுரை கேட்கிறது. சமூக நீதிகாத்த வீராங்கனை பட்டத்தை கி.வீரமணி கொடுத்தபோதாவது - ஜெயலலிதாவிடமே கேட்டிருக்கலாமே.

"வடக்கு வாழ்கிறது... தெற்கு தேய்கிறது..." என்று வடவர்களுக்கு எதிரான கட்சியாக இருந்தது - இன்று இந்தி அ(ழகி)ரக்கி குஷ்புவுக்கு பதவி கொடுத்து அழகு பார்க்கும்போது - அழியாத திராவிட உணர்வு - ஜெவால் அழிய போகிறதா? திராவிடம் என்று சொல்லி சொல்லி - தமிழர்களை பிற திராவிட இயக்கங்கள் ஏமாற்றுவது போல் அம்மா ஏமாற்றாமல் இருப்பது கூட வீராவேச மணிகளுக்கு எரிச்சலை தந்திருக்க வேண்டும் போலும். மேலும் கட்டுரை தொடர்கிறது.

"இது ஒன்றும் அரசியல் அல்ல- _ அடாவடித்தனமாகப் பேசுவதற்கு?
கடைசி கடைசியாக நமது கேள்விகள் மூன்றே மூன்றுதான்! அண்ணாவின் கொள்கையை ஏற்காதவர் எப்படி அண்ணா தி.மு.க.வுக்கு பொதுச் செயலாளராக இருக்க முடியும்?... " என்று கேட்கிறது. என்ன கொள்கை? சட்டென்று ஒரு கொள்கை ஞாபகத்திற்கு வருகிறது. "நாட்டில் உள்ள ஏழைகளை எல்லாம் ஒரே இரவில் பணக்காரர்களாக ஆக்க வேண்டும்" என்கிற உயர்ந்த கொள்கையுடன் பேரறிஞர் அண்ணாதுரையால் "விழுந்தால் வீட்டுக்கு... இல்லையேல் நாட்டுக்கு..." (எப்படி எதுகை மோனை) என்று ஆசை ஆசையாய் கொண்டு வரப்பட்ட நவீன சூதாட்டமாம் லாட்டரி சீட்டை - அம்மா விரட்டியடித்தை சொல்கிறாரா? ஜோசியத்தை விட கேவலமல்லவா லாட்டரி சீட்டு.

 "உழைப்பை நம்பாமல் லாட்டரிசீட்டு கடைக்காரரை நம்புவதற்கும் ஜோசியக்காரரை நம்புவதற்கும் என்ன வித்தியாசம் உள்ளது". அந்த வெடகக்கேட்டை அண்ணாதுரை செய்திருக்கலாமா? ஆனாலும் என்ன அண்ணாதுரையின் "ஏழையை பணக்காரனுக்கும்" கொள்கையை, கனவை அம்மா கலைத்திருக்கலாமா? திராவிட உணர்வாளர்களுக்கு கோபம் வரத்தானே செய்யும். கட்டுரை தொடர்கிறது. "தந்தை பெரியார் அவர்களின் கொள்கைகளை சீரணிக்க முடியாதவர் எப்படி திராவிட இயக்கத்தில் இடம் பெற முடியும்?" என்று கேட்கிறார்கள். பெரியாரின் கொள்கை (திருமணம்) பிடிக்காமல் வெளியேறியவர்களும் - திராவிடம் என்கிற வார்த்தையை உபயோகித்து தானே "திராவிட" முன்னேற்ற கழகம் என்று தானே கட்சிக்கு பெயர் வைத்தார்கள். அப்போது பொங்கினீர்களா?

கட்டுரை தொடர்கிறது. "திராவிடர் இயக்கச் சித்தாந்தத்தின் எதிரியாக இருக்கக் கூடியவர் திராவிட இயக்கத்தில் இருக்க முடியுமா? இது அசல் ஊடுருவல் அல்லவா? இப்பொழுது ஒரே வழி தான் இருக்கிறது. இந்தக் கொள்கைகளை ஏற்கா விட்டால் கட்சியிலிருந்து விலகி நிற்க வேண்டும் இல்லை இவர்தான் தலைமை வகிக்க வேண்டும் என்றால் கட்சியின் பெயரிலிருந்து அண்ணா வையும், திராவிட பெயரையும் விலக்கிக் கொள்ள வேண்டும்." பெரியார்தாசனால் - தம் பெயரை சுலபமாக அப்புறப்படுத்த முடிந்தது. ஆனால் கட்சிகளில் முடியாது. நாத்திக அப்பனுக்கு ஆத்திகன் பிள்ளையாக இருந்துவிட்டால் "நீ எனக்கு பிறக்கல" என்றா சொல்லா முடியும் அல்லது ஆத்திக அப்பனுக்கு நாத்திகன் பிள்ளையாக இருந்துவிட்டால் "நீ எனக்கு பிறக்கல" என்றா சொல்ல முடியும்.

 கட்சி தலைவரின் கொள்கை பிடிக்கவில்லை என்று கட்சியை உடைத்து கொண்டு வந்தாலும் "கட்சி பில்டிங்கையும்" பங்கு கேட்கிற காலமய்யா? திராவிட மணிகளுக்கு இது தெரியாதா? கட்டுரை தொடர்கிறது.
"இறுதியாக அண்ணா திமுக தொண்டர்களுக்கு ஒரு முக்கிய வேண்டுகோள்.
அய்யாவையும் அண்ணாவையும் அவர்கள் கண்ட திராவிடர் இயக்கக் கொள்கைகளையும் ஏற்காத ஒருவர்தான் உங்களுக்குத் தலைவரா? சிந்தியுங்கள்! சிந்தியுங்கள்!!" என்று மாண்புமிகு முதல்வர் ஜெயலலிதாவிற்கே சவால் விட்டிருக்கிறார்கள். என்னவோ எல்லோரும் கொள்கைப்படி இருப்பதாக நினைத்து மனோகரா பாணியில் பேசிவிட்டால் போதுமா?

திராவிட இயக்கத்தில் இருப்பவர்கள் எல்லாம் சம்பாதிப்பதற்கு தான் இருக்கிறார்களாம். கொள்கைக்காக எல்லாம் எவரும் இல்லையாம். அதை தான் நில அபகரிப்பில் இருந்து மணல் கொள்ளை வரை பார்க்கிறோம். திராவிட மணி பார்க்கவில்லையா? நம் மனதில் சில சந்தேகங்கள் வருகிறது. "சொத்துகுவிப்பு வழக்கில் கோர்ட் படியேறிய உங்களால்" திராவிடத்திற்கு இழுக்கு... திராவிடத்தின் பெயரையும், அண்ணாவின் பெயரையும் கட்சி சுமந்துள்ளதால் - அதனால் அண்ணாவுக்கு இழுக்கு. ஊழல் கட்சியான உங்கள் கட்சி போஸ்டர்களில் பெரியார் படத்தை போடுவதன் மூலம் பெரியாரின் பெயரையும் இழிவுபடுத்துகிறிர்கள் என்று வீராவேச மணிகள் அ.தி.மு.க தலைமையை பார்த்து துள்ளி குதித்திருந்தால் - அதில் நியாயமிருக்கிறது என்று சொல்லலாம்.

ஆனால் அப்படி குதிக்க முடியாதே. ஊழலில் ஜெயலலிதாவுக்கு முன்னோடிகள் அண்ணா ஆரம்பித்த கழகத்தில் அல்லவா இருக்கிறார்கள். அதனால் திராவிட இயக்கத்தை தலைமையேற்கிறவன் "திராவிடத்தையும், நாத்திகத்தையும், பகுத்தறிவையும்" பேசி கொண்டிருந்தால் மட்டும் போதாது. முக்கியமாய் "ஊழல்" செய்யாதவனாய் இருக்க வேண்டும். அதை தான் மக்கள் எதிர்பார்க்கிறார்கள். அதற்காக தான் மக்கள் வாக்களிப்பதும், வாக்களிக்காமல் போவதும். நேற்று அய்யாவுக்கு நேர்ந்ததே நாளை அம்மாவுக்கும் நேரும். அதை உணரட்டும் திராவிடங்கள்... "தலைமை பதவிக்கு வருபவன் ஒழுக்கம் நிரம்பியவனாக இருக்க வேண்டும் " என்று சொல்ல அஞ்சுபவர்கள் பகுத்தறிவாதிகளா?

தொடர்புடைய பதிவுகள் :


5 comments:

  1. "நாட்டில் உள்ள ஏழைகளை எல்லாம் ஒரே இரவில் பணக்காரர்களாக ஆக்க வேண்டும்" என்கிற உயர்ந்த கொள்கையுடன் பேரறிஞர் அண்ணாதுரையால் "விழுந்தால் வீட்டுக்கு... இல்லையேல் நாட்டுக்கு..." (எப்படி எதுகை மோனை) என்று ஆசை ஆசையாய் கொண்டு வரப்பட்ட நவீன சூதாட்டமாம் லாட்டரி சீட்டை /////

    super

    "தலைமை பதவிக்கு வருபவன் ஒழுக்கம் நிரம்பியவனாக இருக்க வேண்டும் " என்று சொல்ல அஞ்சுபவர்கள் பகுத்தறிவாதிகளா?/////

    very super

    ReplyDelete
  2. your article is a nettiadi.

    ReplyDelete
  3. முதலில் வீரமணி ஐயா அவர்கள், அவர் திராவிட இயக்கத்திற்கு தலைவராக இருப்பதற்கு ‘தலைமையேற்கும்” தகுதி இருக்கின்றதா என்பதனை சுயபரிசோதனை செய்துக்கொள்ளலாம்.

    ReplyDelete
  4. அறிஞர் அண்ணா பொடி போடும் பழக்கம் உள்ளவர். புரட்சிதலைவிக்கு அந்த பழக்கம் இல்லாததால், அண்ணா கொள்கைகளை பின்பற்றவில்லைன்னு சொல்லி இருப்பாங்க.

    ReplyDelete
  5. //அண்ணா பொடி போடும் பழக்கம் உள்ளவர். புரட்சிதலைவிக்கு அந்த பழக்கம் இல்லாததால், அண்ணா கொள்கைகளை பின்பற்றவில்லைன்னு சொல்லி இருப்பாங்க.//

    அருமை!

    ReplyDelete

தமிழில் இடும் பின்னூட்டங்கள் மட்டுமே வெளியிட இயலும்.

கருத்துகள் எதிர்மறையாக இருப்பினும், அதையும் நாகரிகமாக யார் மனதும் புண்படாதவாறு சொல்லுங்கள்.


மறுமொழி வெளியாக சில நேரங்களில் தாமதமாகலாம்..

LinkWithin

Related Posts with Thumbnails