ஷாரூக்கான் - அமெரிக்கா செய்வது சரியா?

ஷாருக்கானை அமெரிக்க விமான நிலையத்தில் அவமதித்து விட்டார்கள் என்கிற செய்தி ஊடங்களின் பரபரப்பு பசிக்கு கிடைத்த தீனியாகிவிட்டன. சட்ட மீறல் மற்றும் பிரபலங்களை பார்த்து பல்லிளித்து, சலாம் போட்டு தம் கடமையை சரி வர செய்யாதிருத்தல் என்றே பழகிப் போன இந்(த)திய ஜென்மங்களுக்கு - சட்டப்படி தம் கடமையை செய்தால், அது பிரபலங்களை அவமானப்படுத்துவது போல தான் தெரியும். பத்திரிகை செய்தியை பார்ப்போம்.

"நியூயார்க்கில் இந்தி நடிகர் ஷாரூக்கானை அமெரிக்க குடியேற்றத் துறை அதிகாரிகள் இரண்டு மணிநேரம் நியூயார்க் விமானநிலையத்தில் தடுத்து வைத்தனர். இந்திய தொழிலதிபர் முகேஷ் அம்பானியின் மகள், அமெரிக்காவில் உள்ள யேல் பல்கலைக் கழகத்தில் படித்து வருகிறார். யேல் பல்கலைக் கழக நிகழ்ச்சியில் ஒன்றில் பங்கேற்பதற்காக ஷாரூக்கானும் அவருடன் முகேஷ் அம்பானியின் மனைவி நீடாவும் நியூயார்க் சென்றிருந்தனர்.

நியூயார்க் விமான நிலையத்தில் இறங்கியதும், ஷாரூக்கான் என்ற பெயரைக் கேட்டதும் கிலி அடைந்தார் போல் அமெரிக்க குடியேற்றத்துறை அதிகாரிகள் அவரை அப்படியே ஓரம்கட்டி உட்காரவைத்துவிட்டனர். பல்வேறு துறைகளைச் சேர்ந்த அதிகாரிகள் ஒவ்வொருவராக வந்து ஷாரூக்கானிடம் விசாரணை நடத்திக் கொண்டே இருந்தனர். இப்படியே இரண்டு மணிநேரம் ஓடிப் போய்விட்டது. இதன் பிறகே ஷாரூக்கான் விடுவிக்கப்பட்டார்.யேல் பல்கலைக் கழகமும் பல்வேறு துறை அதிகாரிகளிடம் விசாரித்தபோதுதான் அவர் தடுத்து வைக்கப்பட்டிருப்பது தெரியவந்தது." என்கிறது செய்தி.

இந்த அமெரிக்க வேலையை - இந்தியா கண்டிக்க வேண்டாமா? கண்டித்துள்ளது. "அமெரிக்காவில் நியூயார்க் விமான நிலையத்தில் பாலிவுட் நடிகர் ஷாருக்கான் தடுத்து வைக்கப்பட்ட விவகாரத்தை இந்தியா சற்று கடுமையாக அணுகவுள்ளது. தடுத்து நிறுத்துவதும் பின்பு மன்னிப்புக் கேட்பதுமே அமெரிக்காவிற்கு வாடிக்கையாகிவிட்டது என்று இந்தியா வெள்ளிக்கிழமை தெரிவித்துள்ளது. அமெரிக்கா இயந்திரத்தனமாக மன்னிப்புக் கேட்பது போதாது என்றும் இந்தியா கருத்துக் கூறியுள்ளது.

அமெரிக்க உயரதிகாரிகளின் நிலையில் இந்த விவகாரத்தை கொண்டு செல்லுமாறு அமெரிக்காவுக்கான இந்தியத் தூதர் நிருபமா ராவ் கேட்டுக் கொள்ளப்பட்டுள்ளார்." தூதரக அதிகாரிக்கு சம்மனாம். இது தொடர்பாக தில்லியில் உள்ள அமெரிக்கத் தூதரகத்தின் துணை அதிகாரி டொனால்ட் லுவுக்கு, வெளியுறவுத்துறை இணைச் செயலர் (அமெரிக்கப் பிராந்தியம்) ஜாவேத் அஷ்ரப் சம்மன் அனுப்பினார். இதற்கிடையில் அமெரிக்க விமான நிலையத்தில் இரண்டு மணி நேரம் தடுத்து வைத்ததற்காக ஷாரூக் கானிடம் அமெரிக்கத் தூதரகம் மன்னிப்புக் கேட்டுக் கொண்டுள்ளது"

சினிமா நடிகரை பார்த்து பல் இளிக்காத அமெரிக்க சட்டங்களுக்கும், அமெரிக்க அதிகாரிகளுக்கும் தலை வணங்குவோம். அதை விடுத்து அவதூறு பேசுவதை நிறுத்துவோம். இன்றைக்கு அன்னா ஹஸாரே குழுவால் பிரபலமடைந்துள்ள கிரண் பேடியை எண்பதுகளில், போலீஸ் அதிகாரியாக பணிபுரிந்த காலத்தில் - "கிரௌன்" பேடி என்று செல்லமாக அழைக்கும் ஊடகங்கள். காரணம் - மேலிட கோரிக்கைகளுக்கு செவி சாய்க்காமல் தம் கடமையை செவ்வன செய்ததால்... அன்றைக்கு பிரதமராக இருந்த இந்திராகாந்தியின் நான்கு சக்கர வாகனம் நோ பார்க்கிங்கில் நிறுத்தப்பட்டிருந்ததால் - பிரதமர் வாகனம் என்று தெரிந்தும் அப்புறப்படுத்தினார். அதற்கான பலனை அவர் அனுபவிக்க நேர்ந்தாலும் - அதற்காக அவர் வருந்தவில்லை.

இந்தியாவில் இப்படி விரல்விட்டு எண்ணக்கூடியவர்களே - கடமை தவறாதவர்கள். ஆனால் அமெரிக்காவில் தேடினாலும் கிடைக்காது - அதிகாரம் துஷ்பிரயோகம் செய்பவர்கள். ஷாரூக்கான் முஸ்லீம் என்பதால் இத்தகைய விசாரனை என்பது சரியல்ல... மத்திய அமைச்சராக இருந்த ஜார்ஜ் பெர்ணான்டஸும் இத்தகைய விசாரனைக்கு உட்படுத்தப்பட்டிருக்கிறார். அவர் ஒரு கிறிஸ்தவர் இல்லையா? மாறிவரும் சூழலுக்கேற்ப்ப - பாதுகாப்பு முறைகளும் மாறி கொண்டிருக்கின்றன. ஒரு தகவல்... சீக்கியர்கள் விமான கடத்தல் ஒன்றில் ஈடுபடுவதற்கு முன்பு வரை - விமான பயணத்தில் கூட அவர்கள் தங்கள் வீர வாளை எடுத்து செல்ல அனுமதி இருந்தது என்பதை அறிவீர்களா? இன்றைக்கு அது சாத்தியமா?

மக்களுக்கு மதம் பெரிசாக இருக்கலாம். ஆனால் அமெரிக்கா போன்ற தேசங்களுக்கு மத உணர்வுகளை விட மனித உயிர்கள் முக்கியம். மேலும் அமெரிக்காவில் அரசு அனுமதி இல்லாமல் இயங்கிய பல்கலைக்கழகத்தில் பயின்ற இந்திய மாணவர்களின் காலில் வேவு பார்க்கும் விதமான ஒரு கருவியை கட்டிவிட்டது - முறைகேடாக தங்கியுள்ள அவர்களை கண்காணிக்கும் விதமாக... இதுவும் இந்திய அரசால் கண்டிக்கப்பட்டது.

இத்தகைய செயல்கள் எல்லாம் அமெரிக்காவின் ஆணவப் போக்கை காட்டுகிறதா? கடவுளே (?) விமானத்தில் வந்து இறங்கினாலும் அவரையும் அமெரிக்க அதிகாரிகள் சோதனைக்கு உட்படுத்தவே செய்வார்கள். காரணம் மக்களின் பாதுகாப்பும், உயிரும் முக்கியம். எவ்வளவு பெரிய வி.வி.ஐ.பி யாக இருந்தாலும் - ஒரு நாட்டுக்கு செல்ல விமானம் ஏறிவிட்டாலே - அந்த நாட்டு சட்டத்துக்கு கட்டுப்படுபவர்கள் ஆகிறிர்கள். "நான் எவ்வளவு பெரிய நடிகர் தெரியுமா? எவ்வளவு பெரிய அரசியல்வாதி தெரியுமா?" என்று சொல்லி கொண்டே இருந்தால்... சொல்லி கொண்டேடேடேடே இருக்க வேண்டியது தான்.

இந்தியாவை விட மிக பெரிய எல்லைகளை கொண்ட அமெரிக்காவுக்கு எப்படி வேண்டுமானாலும் அச்சுறுத்தல், ஆபத்தும் ஏற்படலாம். அதோடு உலக போலீஸ்காரன் வேறு. அவர்களுக்கு தங்களின் மக்கள் முக்கியம். "கொத்து கொத்தாக மக்களும், மீனவர்களும்" மடிந்தாலும் - அதை பற்றி கவலைப்படாத அரசு ஒரு புறம்... இடம் பெயர்ந்து தமிழகத்திற்கு வரும் வட இந்திய மக்களால் நிகழும் அனர்த்தங்களை தடுக்க ஒரு சட்டம் போட்டால் - அதற்கும் இடைக்காலத்தடை வாங்கும் மேதாவிகள் மறுபுறம். நமக்கென்ன தகுதி உள்ளது - அமெரிக்கனின் கடமை பற்றி பேச.

இதே ஷாரூக்கான் தான் கோக் பானம் குறித்த சர்ச்சையின் போது, "இங்கே தடை போட்டால் அமெரிக்காவில் போய் குடிப்பேன்" என்றார். ஆக, அமெரிக்கா வேண்டும். ஆனால் அமெரிக்க சட்ட, திட்டங்கள் வேண்டாம் என்பது தான் நிறைய பேர் நிலைப்பாடு.  அமெரிக்கனை போல பெப்சி, கோக்கை குடிக்க கற்று கொண்டோம். அமெரிக்க பெண்களை போல காத்தோட்டமாக ஆடை உடுத்த கற்று கொண்டோம். ஆனால் அவர்களை போல சட்டத்தை மதிக்க எப்போது கற்று கொள்வோம்.

தெற்காசியா போதை மருந்து கடத்தலில் முக்கிய பங்கு வகிக்கிறது. எப்படி? கடமையை மீறுபவர்களால் தானே. அமெரிக்க பதிவர் ஆதிமனிதன் அமெரிக்க ஒழுங்கு மற்றும் பண்புகள் குறித்து நிறைய எழுதி உள்ளார். முக்கியமாய் காவல்துறையின் செயல்பாடுகள். ஊடகங்களே... இனி யாரையேனும் அமெரிக்கா சோதனைக்கு உட்படுத்தினால் - அதை பரபரப்பு செய்தியாக்காதீர்கள். "அவர்கள் கடமையை அவர்களாவது சரி வர செய்கிறார்களே" என்று சந்தோஷப்பட்டு, செய்தியை விட்டு தள்ளுங்கள்.

தொடர்புடைய பதிவுகள் :